طرق تحويل مهارتك الى بيزنس ناجح أونلاين

Created by M/Mohamed Ahmed in skills 15/12/2022

" الاجتماع انتهى يا حضرات " .. الجملة دي قالها مستر أحمد التميمي و هو بيرمي نضارته الري بان السودة على الطرابيزة قدامه و بيلف بالكرسي وباصص فى السقف بيتفرج على دخان سيجارته و هو بيطير ويملا المكتب هو و افكار مستر احمد اللي قطعها عليه صوت واحد من اللي حضروا الميتنج " اوامرك يا فندم " و لسة بيلف علشان يقفل الباب دخل عم مسعد : عربية حضرتك جاهزة يا سعادة البيه و السواق مستنيك فيها ..

مين فينا مش نفسه يوصل للمرحلة دي ! بذمتك مش نفسك تجرب الاحساس ده ؟! مش نفسك تحس ان انت اللي بتحرك الحياة مش الحياة هي اللي بتحركك ؟ و ان الدنيا دي كلها بتاعتك انت و بس ؟!! و انك متخلقتش علشان تشتغل لحساب حد ايا كان حتى لو جهة حكومية .. لا انت اتخلقت علشان نفسك و عشان تشتغل لحساب نفسك وبس .. طب ايه اللي مانعك ؟

هتقولي الفلوس .. هقولك عندك حق .. ما هو واحد زي مستر احمد دا مش هيكون اقل من رئيس مجلس ادارة شركة مثلا .. طب و انت فين شركتك ؟؟؟؟؟

جربت قبل كدة تصدق نفسك ؟ تصدق انك مش اقل من مستر احمد فى اي حاجة و انك عندك المقومات اللي ممكن تكون اكتر من اللي عنده اللي تخليك تقعد على نفس الكرسي و الحياة كلها رهن اشارتك انت ؟!

طب تعالى نشوف ازاي ممكن نعمل دا ..
اول سؤال : " انت بتعرف تعمل ايه "

متقولش مبعرفش .. اكيد في على الاقل حاجة واحدة بتعرف تعملها ده انت احمد ربنا اصلا انه خلقك في عصر التكنولوجيا،،، ده لأنك فى ايدك فرصة خيالية للربح اللي تقريبا غير معرض للخسارة و الفرصة دي مكانتش متاحة لأي مجتمع من المجتمعات اللي قبلنا من اول خلق آدم لغاية اختراع الانترنت و الاونلاين بيزنيس .. يعني جايالك انت ..طيب تعرف ان اي مهارة من مهاراتك تقدر بالانترنت تحولها لسلعة مهما كانت بسيطة .. و كل ما تتقنها اكتر سعرك فى السوق هيعلى اكتر .. يبقى احنا اتفقنا دلوقتي انك فى ايدك مفاتيح تقدر تفتح بيها ابواب الحياة اللي بتتمناها بضغطة زرار وشوية صبر و اصرار .. يلا بينا بقى ندور جواك على كنوزك

نسأل تاني : انت بتعرف تعمل ايه ؟؟ ..

نفترض مثل انك مبتعرفش تعمل حاجة غير انك تتشات مع صحابك على الفيس .. طيب تعرف ان الكتابة على الكمبيوتر او اللابتوب و الموبايل بسرعة تعتبر مهارة بيفتقدها ملايين البشر على مستوى العالم ؟! .. طب ما انت ممكن تشتغل فى الفري لانسينج .. ناس كتييير بتبقى عندها افكار و موضوعات مكتوبة على ورق و عايزة حد ينقلها ع الوورد مثلا نظير مقابل مادي على كل ورقة ف انت مش هتعمل حاجة غير انك هتقعد تكتب الحاجات دي لانك بتعرف تستعمل الكيبورد كويس و تبعته فى ميل و تستنى الفلوس تتحول لحسابك .. طبعا ده المقابل بتاعه مش كبير بسبب علشان المهارة بسييييطة جدا و يقدر يقوم بيها طفل صغير ..

و لو اتمكنت منها اكتر ممكن تبدأ تعمل انت محتويات مميزة فتلاقي الناس بتطلب منك انك تصيغلهم شغلهم كنوع من الدعايا و الاعلان ليهم لان اسلوبك جذب انتباههم و ساعتها انت اللي هتحدد المقابل اللي انت عايزه و بكده تبقى حطيت رجلك على اول سلمة اهو بعد ما كانت بدايتك ايه ؟؟ نقل المقالات .. شوفت بقا

طب انت مثلا ممكن تكون واحد مبيسيبش حد ف حاله هههه عمال تتريق عاللي رايح و اللي جاي و لسانك اااد كدة .. تعرف ان دي مهارة ؟ اه والله .. لأنك لو وظفت قدرتك على السخرية دي في اطار كوميدي ساخر ممكن جدا تعمل لنفسك قناة على اليوتيوب و تكسب فلوس من عدد المشاهدين ليك و كل ما الناس هتحبك و هتحب المحتوى اللي بتقدمهلهم كل ما سعرك هيزييييد و انت و شطارتك بقة .. و اهو تبقى بتكسب فلوس بدل ما انت عمال تاخد ذنوب فى الرايحة و الجاية كدة ههههه .. و احنا شوفنا نماذج كتيرة الفترات اللي فاتت لليوتيوبرز كانوا بيقدموا محتوى كوميدي ساخر على اليوتويب وبعدين اتطلبوا ف حاجات كبيرة و تمثيل وليلة كبيرة اوي سعادتك

طيب نفترض انك خريج كلية معينة و كنت بتحب مجال ما وفضلت تعمل سيرش عليه لحد ما بقيت اكتر واحد فى اصحابك فاهم فى الحاجة دي و ارجع تاني واقولك ( مهماااا كانت بسييييطة) حتى لو كانت " كيفية نطق مخارج الحروف بطريقة صحيحة " خلاص اتعلمتها فى الكلية و مارستها ف حياتك .. طب و بعدين ؟ استفدت ايه ؟؟ .. طب ما انت ممكن تزود عليها شوية معلومات من كتب ومراجع كبيرة و حط ايدك على شوية معلومات غير متداولة فى المجال دا و اعمل كورس اونلاين .. اعمل لنفسك خطة و منهج و اسلوب مميز و انطلق .. اعلن عن الكورس بالسعر اللي تحبه و يفضل لو مبلغ رمزي في الاول للتجربه و ابدأ اعرض محتواك بأقل الامكانيات " شوية معلومات و كاميرة موبايلك" و لو انت شايف انك عندك القدرة انك تشرح مادة معينة ممكن تعمل شرح لمنهج دراسي و ترفعه على النت واعمل لنفسك اسم وسعر فى السوق و نقووول تاااني كل ما تبقى مميز كل ما سعرك هيعلى و هتتعرف اسرع .

بتعرف ترسم كويس ؟؟ كل اللي هتعمله بس انك هتعرض شغلك على جروبات كبيرة و وانت بتعرضه اكتب فوق الصورة اسمك ورقم التواصل .. متهيألي مش محتاجة اوضح لو انت رسمك حلو فعلا في البورتيريهات مثلا ممكن يكون الاقبال عليك ازاي في المناسبات اللي زي الفلانتاين و عيد الام و الحاجات دي .. و لو بتعرف ترسم جرافيك برضو .. انت بس ارسم و السوشيال ميديا هتقوم بالواجب و زيادة بس انت انتشرررر شوية على الفيس و شوية تويتر كدة يعني ..

طب انت مبتعرفش تكتب على الكمبيوتر و لا ترسم و لا عندك القدرة على تقديم محتوى ساخر ولا هتعرف تعمل حاجة من اللي قولناهم .. بس اكيد بتعرف تتكلم ههههه

اهي دي في حد ذاتها مهارة برضو .. تعرف ان في حاجة اسمها " التفريغ الصوتي " يعني بتحول محتوى مكتوب لصوت سواء كتاب او مقال او بحث ,, على حسب بقى،،، ده في ناس كمان استغلت ده لصالحها و عملت لنفسها قناة على اليوتيوب باسمها و حولت كتب كتير لصوت فقدر يسمعها المكفوفين و الغير قادرين على القراءة بس خلي بااالك من " حقوق المليكة " علشان لو اللي هتقراه دا كتاب من الكتب اللي موجودة في السوق وليها سعر معين و تيجي انت تعرضه للناس ف انت كدة بتاكل حق صاحبه ف لو هتقرأ كتاب من اللي موجودين في الاسواق لازم تستفسر عن الجزئية دي الاول علشان تعرف ازاي تقراه من غير ما تتعدى على حق حد ..

احنا في المقالة دي اتكلمنا عن حوالي 4 او 5 افكار بس و افكار مقتبسة من ابسط المهارات اللي موجودة عند الناس كلها اللي هي الكلام و الكتابة والرسم و السخرية .. طيب فكر لو ركزنا في الحاجات الكبيرة اللي بتميزك انت بالذات عن اي حد تاني متخيل ممكن نوصل لايه ؟! .. يلا فكر و دور على كنوزك المدفونة جواك و احنا هنفكر معاك و هنرجعلك تاني بافكار جديدة و ادوات تساعدك توصل لمركز مستر احمد التميمي ..